ಯುಗಳ ಗೀತೆ - ೭

ನಿನ್ನ ರೂಪು ಬಲು ಚಂದ, ನಿನ್ನ ಮಾತೆ ಮಕರಂದ
ಹೇಗೋ ಏನೋ ನೀ ತಂದೆ ನನ್ನ ಹೃದಯದಿ ಆನಂದ
ಬಾರೋ ನನ್ನ ಹಮ್ಮೀರ, ನೀನೆ ನನ್ನ ಸರದಾರ
ನನ್ನ ಬಾಳ ಪುಟಕೆಲ್ಲ ನಿನ್ನ ಪ್ರೀತಿಯೆ ಆಧಾರ

ಮನದ ಗುಡಿಯ ಗರ್ಭದಲ್ಲಿ ನಿಂತೇ ನೀ ಮೂರ್ತಿಯಂತೆ
ಪ್ರೇಮ ಪೂಜೆ ಸಲ್ಲಿಸು ಎನ್ನುತ ಪ್ರೀತಿಯ ಬೇಡಿ ನಿಂತೇ
ಪ್ರೀತಿ ಧಾರೆ ಸುರಿಸಿ ನೀನು ಮುಂಗಾರಿನ ವರ್ಷ ತಂದೆ
ಬರಡು ಮನದಿ ಮಧುರ ಪ್ರೇಮ ಆಸೆ ಚಿಗುರನ್ನು ತಂದೆ
ನಿನ್ನಯ ನಲ್ಮೆಗೆ ಅಂದೇ ನಾ ಸೋತೆನು ನೀನು ಇರದೇ ನಾನು ಇನ್ನು ಬಾಳಲಾರೆ

ನಿನ್ನ ಪ್ರೀತಿ ನನ್ನಯ ಮನಕೆ ತಂದಿತು ನೂತನ ಅರ್ಥ
ನಿನ್ನ ಪ್ರೇಮ ಪಡೆಯಬೇಕು ಎನ್ನುವುದೇ ನನ್ನ ಸ್ವಾರ್ಥ
ನಿನ್ನ ನೆರಳ ಆಸರೆಯಲ್ಲಿ ನನ್ನೆಲ್ಲ ಬದುಕ ಕಳೆವೆ
ನಿನ್ನ ಒಲವ ಸಿರಿಯನೊಂದೆ ಕೊನೆವರೆಗೂ ಬೇಡುವೆ
ಮುಡಿಪು ನನ್ನೆಲ್ಲವು ನಿನ್ನಯ ಪ್ರೀತಿಗೆ ನೀನು ಇರದೇ ನಾನು ಇನ್ನು ಬಾಳಲಾರೆ